美斯賓施馬鬥射術
今日大年初二開年，西盃4強首回合即爆發國家打吡，巴塞隆拿主場火併宿敵皇家馬德里。巴塞王牌美斯嘅傷勢冇乜大礙，預計今仗可披甲，但「銀河艦隊」箭頭賓施馬腳風超順，兩大射手正面交鋒，隨時合演入球騷，中位數3/3.5球大盤有買趁早。
（周四凌晨4時開賽）
巴塞雖然一向靠美斯搵食，今季佢一唔出場就出事，西盃8強首回合收起呢位隊長，作客即吞西維爾兩蛋，次回合出番美斯返主場狂數6比1晉級，日前聯賽對華倫西亞，又係靠美斯省兩粒先追和2比2，而佢嗰場仲負傷捱到尾。美斯仍需要接受檢查才確認傷勢，但據報佢覺得唔太嚴重，相信今仗可上陣，依家「地上最強」有佢同冇佢差好遠，呢位球王今季喺各項賽事轟29粒兼有14次助攻，搞到主帥華爾維迪唔敢亂咁輪換，而且今仗係國家打吡，美斯一定想頂硬上。
另一邊廂，皇馬射手賓施馬同樣弗爆，佢上仗贏艾拉維斯又入1粒，連續4場有士哥，合共入咗6球，如果佢今仗再有進帳，就會追平自己在皇馬連續5場入波嘅最佳紀錄。賓施馬表現回勇，有指佢除咗隨球隊訓練外，亦請咗一位體能訓練師到佢屋企幫佢加練，令呢位法國箭頭冇再出現超重，少咗受傷，狀態更加穩定，實同美斯鍊過。
國家打吡必定去盡
每逢國家打吡，兩軍為爭勝例必踢到飛沙劈石，總計各項賽事在內，巴塞與皇馬近7次交手一共合力炮製29球，當中5次總入球達4球或以上，相信今仗實多波入，就算中位數調至3/3.5球照揀大盤。