今晚壓軸戲班霸拜仁慕尼黑主場迎擊史浩克04，拜仁不足兩日前至喺德國盃作客首都搏到加時驚險過關，球隊目前兵源唔係咁充裕，匆匆再戰好吃力，面對欠缺火力但鬥志十足嘅史浩克，預期會係一場苦戰，拜仁主場出擊贏面當然較高，但未必可以輕鬆大勝，推介中位數3.5球細盤。
（on.cc東網周日凌晨1時30分直播）
雙方主力門將齊復出
拜仁上輪德甲作客不敵利華古遜，喺積分榜不但已被多蒙特拋離7分，連次席位置亦畀慕遜加柏搶埋，今晚主場出擊當然要追分，不過佢哋周四凌晨至喺德國盃作客首都，同哈化柏林激戰120分鐘至贏3比2，教練尼高高華一來唔想放棄德國盃，二來又冇乜輪換本錢，搞到多名主力包括羅拔利雲度夫斯基、堤亞高艾簡達拿同哥列斯卡等都搏足全場，要及時回氣並唔容易，今晚未必夠力全場搶攻。好在門神紐亞傷愈復出把關，球隊喺佢缺陣下兩仗共失5球，今晚有番佢壓陣防線會穩陣好多。
至於史浩克亦啱啱踢完德盃，不過主場輕取杜塞爾多夫耗力冇咁多，少帥泰迪斯高喜歡重用新人，拚勁十足但組織進攻能力甚弱，今晚作客唔易攻破拜仁大門。泰迪斯高近仗重用嘅年輕門將紐布爾上輪被逐要停賽，黑柴認為呢個反而係好消息，皆因佢經驗不足，過去3仗表現亦每況愈下，今仗停賽迫使教練用番費文把關，呢位隊長為踢爭氣波必定打醒精神，拜仁想大勝難度更高。