般尼茅夫近3對賽全吞蛋
今晚英超焦點戰，「2哥」利物浦主場硬撼般尼茅夫。利物浦近期突然跌Watt，連續兩場聯賽失分，為爭冠不容再失，王牌穆罕默德沙拿唔使參加下月國際賽，專心為紅軍數胡絕對有沖喜作用，加上近年交手食住般茅，今仗再遇「私房菜」可趁機反彈，直取讓球主勝。
（Now 621周六晚11時直播）
老實講，利物浦近期真係發揮失常，連續兩場聯賽打和李斯特城同韋斯咸，尤其係上仗作客「錘仔」，若非對手把握力曳，幾乎輸波而回。換個角度講，紅軍該仗突然有韋拿杜姆同佐敦軒達臣受傷唔出得，咁都保住1分，其實都幾有運，老將占士米拿賽後都忍唔住話：「我哋有乜壓力呢？為護級、為生計踢波先至有壓力，依家我哋排緊前列，應該要盡情享受，冇必要咁憂心。」同時，由於埃及已提早出線非洲國家盃決賽周，因此埃及宣布穆罕默德沙拿喺下月嘅國際賽免役，少咗舟車勞頓，呢位王牌可以喺呢段爭標關鍵期專心為紅軍效力，絕對係好消息。
般尼茅夫傷兵成籮
般尼茅夫經過季初唔錯嘅開局後，近期表現反覆，既可忽然狂數車仔4粒，但又會無喇喇輸畀弱旅卡迪夫城，近8仗贏得2場，而且佢哋今仗有射手哥林威爾遜及快翼大衞布魯克斯因傷倦勤，後衞西蒙法蘭西斯同中場路易斯曲克亦提早收咧，而從紅軍借用嘅尼達利基尼又因條例唔可以倒戈，加上排中游冇乜護級壓力，戰意唔及紅軍。
翻查紀錄，利物浦同般尼茅夫近3次交手，紅軍全部贏晒兼至少贏3粒，明顯格食格，今仗利物浦可藉地利食「私房菜」博反彈，就算讓兩球，照揀紅軍讓球主勝。