今晚英超「雙紅」為爭前4位置分途出擊，其中早場有富咸主場鬥「紅魔」曼聯。「紅魔」喺蘇斯克查帶領下強勢回勇，就算作客表現都唔失禮，呢場對住踢親Big6球隊都冇貨交嘅富咸，曼聯要全取3分話咁易，1.49倍客勝咪錯過。
（Now 621周六晚8時30分直播）
英超前4爭奪激烈，暫時以50分做住4哥嘅車路士，今輪要硬撼強敵曼城，好有失分可能，以48分緊隨其後嘅曼聯梗係唔執輸，希望把握反超前嘅機會。查實「紅魔」自從揾嚟名宿蘇斯克查出任看守領隊之後，昔日費格遜時代嘅魔性返晒嚟，各項賽事近10仗取9勝1和，近5仗作客仲大獲全勝，當中包括先後擊敗熱刺同阿仙奴兩支頂級勁旅，表現夠晒說服力。陣中一眾球員狀態有顯著提升，上仗「紅魔」就靠拉舒福特同保羅普巴聯手炮製致勝球，1比0擊敗李斯特城。相反富咸今季8次面對Big6球隊輸晒，明顯難同英超勁旅周旋，今場對住重生嘅「紅魔」，隨時難逃一劫。
阿仙奴炒哈有鑊氣
同樣有機會爭第4，仲包括作客面對哈特斯菲爾德嘅阿仙奴。積分榜包尾嘅哈特斯菲爾德雖然中途換帥，揾嚟德國少帥薛華特執教，可惜球隊表現未見起色，近3仗聯賽輸晒之餘，仲1球都入唔到，其中包括上仗以0比5遭車路士血洗，整體實力認真唔掂，所以就算兵工廠近期聯賽作客成績唔算出色，但齋靠球員個人質素，要擊敗哈軍絕對綽綽有餘，阿仙奴讓一球照捧2.55倍讓球客勝。