後防殘陣前線醒神
今晚意甲「1哥」祖雲達斯將會作客薩斯索羅。祖記今季喺聯賽雖然未輸過，不過近期後防傷兵一大籮，加上近年鬥薩斯索羅經常上演入球騷，今場隨時再靠進攻取勝，中位數2.5球大盤捧得過。
（Now 638、有線614、654、602及662台周一凌晨1時直播）
連仗失利反彈決心強
祖雲達斯開季22場聯賽19勝3和，係目前5大聯賽唯一未敗之師，未計今輪比賽前，祖記領先第2位嘅拿玻里9分，聯賽8連霸指日可待，不過佢哋近期後防出現唔少傷兵，三大主力基亞連尼、邦路斯及巴沙利全部受傷，加上球隊喺1月份冬季轉會窗放走中堅貝拿迪亞，防守力嚴重受損，繼意盃8強以0比3輸畀阿特蘭大衞冕失敗，上場聯賽主場又被帕爾馬逼和3比3，連續2場加埋失6球，幸好一班前鋒基斯坦奴朗拿度、保羅戴巴拿等王牌保持勇態，為助球隊重返勝軌，今場必定搏盡爭取入波。
鬥薩斯索羅入波保證
另一邊廂，今仗有主場之利嘅薩斯索羅，踢法一向重攻輕守，近5場主場有4次總入球達3球或以上，後防唔掂但進攻火力亦唔可以睇小，而且佢哋排喺聯賽榜中游，冇太大搶分壓力，隨時放開懷抱與祖記鬥攻。
事實上，雙方近年交手經常出現大手交易，近5次聯賽碰頭一共合力炮製咗20個入球，當中有4次開3球或以上，可見兩隊交鋒已經係入波保證，今場中位數2.5球大盤真係有捧趁早。