車仔將帥貼錯門神
今日大年初六，樂比先同大家拜個年，祝各位讀者財源廣進，波運亨通、身體健康。今晚英超大戰曼城主場對車路士，雖然曼城讓到一球，但樂比依然睇好上盤；車路士近期表現飄忽，好大程度同將帥不和有關，連頭號球星夏薩特都有離心，隊波唔團結好難阻到曼城爭標，加上防線充斥問題，相信曼城可贏波全力衝刺。
（Now 621周一凌晨零時直播）
未計周六賽事，車路士落後榜首12分之多，今季目標都係餘下3大盃賽，尤其係聯賽盃決賽將於今個月尾舉行，如果拎到呢隻盃仔嘅話，分分鐘可保住領隊沙利份工，所以聯賽對車路士嚟講，只能夠講係盡力而為，絕對冇曼城咁重視。
藍戰士作客跌Watt
車路士自踏入2019年後狀態好唔穩定，上月尾慘吞般尼茅夫4蛋，表現認真得人驚，雖然上仗以5比0大勝哈特斯菲爾德看似反彈，但哈仔今季長期積弱，車仔主場大勝只屬正常發揮，況且車仔今季主場同作客表現有好大落差，今仗又輪到作客隨時表現走樣。
事實上，車路士今季作客Big6成績令人失望，聯賽先後輸過畀熱刺、阿仙奴，聯賽盃4強亦輸畀熱刺，幾場敗仗都輸得肉酸，可見佢哋今季面對逆境嘅能力甚差。
車路士今季防線極唔穩陣，一對中堅大衞雷斯同魯迪格固然甩漏甚多，作為世上最佳防中嘅尼高路簡迪又改踢攻擊中場位置，對住曼城呢啲高級數球隊，真係唔知要輸幾多粒。最慘係近月不斷傳出領隊沙利同球員不和嘅消息，夏薩特來季轉投皇馬嘅消息亦甚囂塵上，呢啲負面新聞都好影響車路士近期嘅作戰狀態，即使沙利愛將希古恩加盟冇耐已開齋，但進攻問題遠遠唔及防線問題咁嚴重。
心水波膽3比1
曼城今季主場對Big6表現相當對辦，先後擊敗曼聯、阿仙奴同利物浦，表現絕不拖泥帶水，周中對愛華頓贏2比0可以話睇定嚟食，哥迪奧拿亦留有一手，奇雲迪布尼同史達寧都放喺後備席，留待今場搏殺，曼城今場讓一球可謂坐和望贏，樂比心水波膽係3比1，希望可齊齊過肥年。