今晚英超有場獨腳戲，由聯賽排第7嘅狼隊喺主場迎戰「喜鵲」紐卡素。狼隊今季可謂「遇強愈強、遇弱愈弱」，而紐卡素貴價新兵米基爾阿米朗有機會首度披甲，何況佢哋遇非Big 6球隊頂得兩嘴，受讓必捧讓球客勝。
（Now 621周二凌晨4時直播）
近7次對非Big6分子未輸過
今季先升班嘅狼隊，最令人印象深刻嘅係遇強隊特醒，聯賽贏過熱刺同車仔，及打和曼城同阿仙奴，英足盃更踢利物浦出局，今季9次鬥Big 6球隊獲3勝3和3負，唔講得笑。不過佢哋撞正榜下游球隊就提唔起勁，單計聯賽，近期對水晶宮、富咸、卡迪夫城、哈特斯菲爾德及白禮頓等下游分子，只得1和4負，認真曳爆。
班主泵水
暫排尾4嘅紐卡素為求護級，喺冬季轉會窗臨閂之前以破球隊紀錄嘅2,100萬鎊轉會費，簽入巴拉圭中場米基爾阿米朗，何解孤寒班主艾殊利轉死性？一來主帥賓尼迪斯講明再唔增兵就劈炮，二來降班就搵唔到買家接盤仲大鑊，所以先肯使錢，無論如何對士氣點都有幫助，再者「喜鵲」近7次對非Big 6球隊獲2勝5和未輸過，必捧讓球客勝。