主隊冇Heart 對手冇態
歐霸32強首回合費倫巴治主場對辛尼特周三凌晨率先開打，費倫巴治管理立立亂，現時喺土超下游掙扎，護級大過天，歐霸無心戀戰。辛尼特仲處於俄超歇冬期間，球隊僅靠熱身賽保持狀態，而且佢哋踢歐霸保守到爆，近6場歐霸5次總入球開出2球或以下，中位數2.5球入球細熱得合理。
（Now 643周三凌晨1時55分直播）
作為土超傳統勁旅，費倫巴治今季戰績真係差到爆，現時排第14位，淪為護級分子，主要原因係球會管理層相當短視，現任教練耶拿已經係費倫巴治近5年第7任領隊。之前係由荷蘭名將高古執教，雖然幫球隊打入歐霸32強，但聯賽成績未如理想，一樣要食無情雞。
耶拿曾經喺2013至14年球季帶領費倫巴治奪得土超冠軍，佢去年12月中上任之後，執教8場獲3勝2和2負，成績叫做止咗血。不過球隊仲會唔會嘥精力去爭歐霸，呢個確係一個疑問。
辛尼特穩陣波唔亂攻
至於作客嘅辛尼特一向重視歐霸，不過由於俄超歇冬仲未重開，球員狀態始終未操起，加上辛尼特今屆歐霸踢法比較穩陣，6場分組賽只入6球，基本上夠贏就算略欠大勝決心，預期今場亦唔會太過進取，留番次回合返主場再砌過，推介2.5球入球細。