歐聯16強首回合，意甲羅馬主場火併葡超勁旅波圖，羅馬踢法開放入得又失得，近10場歐聯有9場總入球達3球或以上，對住近4戰歐聯每場起碼攻入3球嘅波圖，有望合演入球騷，首選中位數2.5球入球大。
（Now 644、有線662及602台周三凌晨4時直播）
「雌狼」入得又失得
「雌狼」羅馬前線雖有迪斯高、辛基斯安達、柏德列舒希克等國腳級球員，不過後防表現差強人意，對上5場比賽除對弱旅基爾禾保持清白身，其餘4場加埋失咗13球，包括喺意盃8強以1比7大敗畀費倫天拿，而且羅馬近10場歐聯共入21球、失19球，當中9場總入球達3球或以上，包括上屆8強同巴塞隆拿兩回合總比數踢成4比4，4強又同利物浦合力炮製13個士哥，擺明有前無後。羅馬近8場歐聯主場贏7場，當然希望藉主場之利搶先機，踢法唔會保守。
波圖係今屆分組賽5支不敗球隊之一，合共轟入15球，進攻火力僅次巴黎聖日耳門及曼城，而且佢哋對上4場歐聯每仗都能射入3球或以上，攻力有番咁上下。兩軍最近一次歐聯碰頭係2016/17球季嘅附加賽，當時波圖作客羅馬大勝3比0，兩回合計以4比1淘汰對手，心理佔上風，今次作客無懼與主隊鬥攻，建議捧中位數2.5球大盤最穩陣。