蘇B行運行到腳趾尾
歐聯16強首回合今晚正式開打，重頭戲梗係弗到爆嘅曼聯主場火併巴黎聖日耳門（PSG）。紅魔嘅看守領隊蘇斯克查真係行運一條龍，接手後除咗保羅普巴、拉舒福特等個個翻生之外，咁啱撞正PSG有尼馬、卡雲尼齊齊受傷，挾近11場贏10仗嘅強勢，可藉地利響頭炮，寧買當頭起，曼聯小讓平半必捧上盤。
（Now 643周三凌晨4時直播）
巴黎聖日耳門上年12月歐聯抽中對嗰陣沉到爆嘅曼聯，外界異口同聲話佢哋抽到好籤，當時蘇斯克查仲喺挪威家中食花生睇緊抽籤，估唔到依家要領軍出戰PSG，而紅魔喺「蘇B」接手後11仗取得10勝1和不敗佳績，重新殺上聯賽前4，表現全面回勇，實在係世事如棋。
喺「蘇B」麾下，同前任主帥摩連奴不和嘅保羅普巴即刻大爆發，近9場有披甲賽事入8粒兼有5次助攻，「福仔」拉舒福特、安東尼馬迪爾亦頻頻入波，成隊波脫胎換骨，依家邊隊對佢哋都驚，同抽籤嗰陣截然不同。
麥巴比獨撐聖日耳門
蘇斯克查唔單止識教番好隊波，仲要「紅」運當頭，因為PSG有王牌尼馬因蹠骨受傷要長抖，今仗肯定缺陣，失去呢位進攻核心，不但畀里昂打破聯賽不敗身，法足盃對丙組球隊維利法蘭，喺法定時間竟互交白卷，要到加時先贏波晉級，可見影響好大。
正所謂屋漏偏逢連夜雨，巴黎聖日耳門喺日前聯賽對波爾多，另一箭頭卡雲尼又整親大腿肌肉，加上後衞梅尼亞喺碰撞中出現輕微腦震盪，兩人今仗應會倦勤，前線得番基利安麥巴比單打獨鬥，實力大減，真係連個天都幫埋「蘇B」。翻查紀錄，原來曼聯喺主場對住法國球隊取得10勝3和不敗，今仗讓平半都冇有怕，上盤有買趁早。