今個周中歐聯重燃戰火，周四凌晨嘅16強首回合有多蒙特作客熱刺，以及皇馬作客阿積士，我相信兩支客軍係坐和望贏格局。
先講多蒙特作客熱刺，熱刺傷兵滿營之下近期係咁贏波，全靠孫興民、基斯甸艾歷臣等主力捱義氣頂硬上，不過球員始終係人唔係機器，長期冇得抖遲早跌Watt，而且歐聯係特別注重細節嘅盃賽，稍一不慎足以致命。多蒙特吸取上仗聯賽領先3粒都被追和嘅教訓，今仗一定小心翼翼，我相信佢哋至少可全身而退。
英冠金絲雀火力猛
至於皇馬作客阿積士，「銀河艦隊」喺蘇拿利帶領下已經全面復甦，先捧走世冠盃，於聯賽又殺番上次席，爭取歐聯4連冠更係重中之重，抽到對阿積士算係好籤。雖然阿積士青春逼人，但點秤都唔及皇馬，今仗作客有力搶先機。除咗兩場歐聯大戰之外，周中英冠亦加開快車，其中「金絲雀」諾域治作客普雷斯頓，諾域治近4仗取得3勝1和，包括擊敗升班勁敵列斯聯，現時升上榜首，未計今輪，諾域治已經入咗60粒，拍住西布朗成為英冠最強火力球隊之一，普雷斯頓好難頂得住佢哋嘅狂轟猛炸，「金絲雀」平手盤值得捧場。