力爭歐聯4連霸嘅皇家馬德里16強對手係阿積士，首回合會先作客荷蘭阿姆斯特丹。雖然論牌面，今場可以話係16強中最懸殊嘅對賽組合，不過今屆皇馬欠缺施丹同C朗，確係冇咗一份霸氣，而且去到淘汰賽階段，步步為營好緊要，所以皇馬近3屆16強共6場賽事，就有5次半場同對手打和，今場不妨再向半場和埋手。（Now 644、有線662及602台周四凌晨4時直播）
阿積士曾經係4屆歐洲盟主，雖然最近1次進身16強已經數到2005/06球季，不過，阿積士今屆分組賽6戰3勝3和未輸過，能夠相隔13年再闖16強絕非僥倖，唔少球評家都講過「歐聯淘汰賽冇弱旅」，此話絕對可以提醒一眾球迷，唔好太過盲目捧所謂傳統豪門。
蘇拿利領軍求穩陣
事實上，今季皇馬因為冇咗施丹同C朗，球會唔使再喺鎂光燈下比賽，確係冇咗啲霸氣，但正正合晒主帥蘇拿利穩穩陣陣嘅執教手法；其實低調嘅皇馬成績絕對唔失禮，近7仗6勝1和，包括西班牙盃1比1打和巴塞，以及作客3比1擊敗馬體會。
皇馬除咗連奪3屆冠軍，近3屆16強面對羅馬、拿玻里及巴黎聖日耳門更錄得6戰全勝，主、客場表現分野不大，6場比賽中有5次開出半場和，呢個亦正正符合蘇拿利嘅手法。歐聯兩回合制，首回合最緊要穩陣，相信今場半場和機會仍然高唱入雲。