近4次交鋒全演入球騷
周四凌晨續演兩場歐聯16強首回合，英超熱刺喺溫布萊主場迎戰德甲榜首多蒙特。雖然兩軍隊長兼射手哈利卡尼及馬高列奧斯均因傷缺陣，但從近期比賽所見，冇咗呢兩名主力，對彼此整體發揮影響不大，尤其近期踢到曉飛嘅孫興民係多蒙特剋星，重返家鄉倫敦比賽嘅查頓辛祖亦弗到漏，既然兩軍對上4次交手總入球都達3球或以上，捧2.5球大盤最啱數。
（Now 643、有線616、656台周四凌晨4時直播）
今次係兩軍近4屆歐洲賽第3度交鋒，上屆歐聯分組賽，熱刺主、客分別以3比1及2比1擊敗多蒙特，取得首名資格進身16強，不過兩隊喺2015/16歐霸16強交鋒，多蒙特主場先勝3比0、作客再贏2比1，同樣地雙殺熱刺晉級，計往績可以話旗鼓相當。
孫興民剋住蜜蜂兵團
熱剌幾名傷兵包括前鋒哈利卡尼、中場迪利阿里及後衞賓戴維斯雖然已復操，但前者肯定唔會上陣，前線繼續要靠近3場聯賽都有士哥嘅孫興民孭飛。曾經喺德甲搵食嘅孫興民，過往對住多蒙特特別有計，效力漢堡及利華古遜期間，5次上陣鬥多蒙特合共射入5球，而上述提過熱刺近4次喺歐洲賽鬥多蒙特，孫興民3場有士哥，以佢近期弗爆狀態，有望繼續喺多蒙特身上搵到着數。
多蒙特隊長馬高列奧斯喺早前德國盃對雲達不來梅一役傷出，不過上場聯賽冇咗佢，多蒙特仍能攻入賀芬咸3球，其中18歲嘅英格蘭新星查頓辛祖唔只先開紀錄，之後仲間接助攻畀馬里奧葛斯及拉菲爾古里路入波，一個人孭起整條多蒙特攻擊線。
查頓辛祖回鄉要攞威
原來查頓辛祖係喺倫敦南部地區坎伯韋爾出世，今次係佢2017年離開曼城後，首次代表多蒙特重返家鄉比賽，賽前佢講明好期待喺家人及朋友面前大顯身手，因為呢個係佢自細夢想，落場肯定搏到盡。不過多蒙特上場聯賽喺領先3球之下，最終仍被賀芬咸連追3球打和3比3，防守似乎有唔少漏洞，加上領隊法夫爾主張進攻足球，今次作客溫布萊球場相信一樣會搶攻，中位數2.5球大盤捧得過。