賀芬咸明恰漢諾威

賀芬咸明恰漢諾威
東網免費直播德甲，中游嘅賀芬咸主場迎擊護級嘅漢諾威，賀芬咸上輪作客多蒙特喺3球落後下奇迹追和，目前士氣好到加零一，為搶下屆歐洲賽入場券，今晚主場迎弱旅誓要大開殺戒，賀芬咸讓到球半、兩球，黑柴都照追上盤，呢場波我哋安排咗英語旁述，大家記得準時上東網啦。

（on.cc東網周六晚10時30分直播）

賀芬咸正力爭下屆歐戰入場券，上輪作客西法倫球場對死敵多蒙特，自佢哋升上德甲後，立即畀多蒙特球迷辱駡，話佢哋嘅金元足球污染咗德甲健康發展，雙方早結下深仇，呢場波賀芬咸踢到完場前15分鐘仲落後緊0比3，全憑永不放棄精神，喺尾段連追3球奇迹搶番1分，呢場和波對士氣嘅幫助，仲好過連贏兩場，今季至加盟嘅阿爾及利亞射手貝迪科爾發威，佢同祖連頓、卡拉馬歷組成嘅賀芬咸三叉戟，今季已合共入咗20球，今晚強勢主場出擊，就算領先咗都唔會留手，勢必全力爭取大勝。

降班膽漢諾威作客水
漢諾威計表現係降班膽，上輪主場同紐倫堡水鬥水嘅榜尾大戰，全賴開波11分鐘對手踢少個，大部份時間人多打人少至贏到，而且作客係佢哋弱項，對上一次作客贏波已經係2017年10月，之後年幾以來德甲22場作客都未贏過，今晚陣容亦殘過主隊，加上近5次作客賀芬咸全敗，上季到訪輸1比3，結合今仗形勢，預期會輸得更慘烈。