今晚英格蘭足總盃16強壓軸尾場，乙組仔紐波特郡主場挑戰英超「1哥」曼城。雖然「藍月亮」有歐聯顧慮，但班波近期極度搶韁，就算遣派非必然正選上陣都夠殺，讓球主客和讓3球照捧讓球客勝。
（周日凌晨1時30分開賽）
曼城叫緊胡做「4冠王」，咁多條線當中今晚對紐波特郡叫較易踢，不過下周中歐聯對史浩克04，主帥哥迪奧拿都要作出輪換，王牌阿古路好大機會抖抖，預計會起用加比爾捷西斯衝鋒。「耶穌」喺今屆本土盃賽特醒，英聯盃連同英足盃，近4仗盃賽轟6粒，其中英聯盃4強對伯頓食出大四喜，專恰弱隊。另外較少擔正嘅翼鋒馬列斯，亦大有機會騷吓哥利。
紐波特郡英乙都踢唔掂
紐波特郡喺英乙只排15，近6仗僅2勝，雖然盃賽表現突出，但所淘汰嘅李斯特城、米杜士堡等，難同弗到爆嘅曼城相提並論。就算「藍月亮」略作留力，實力都贏幾條街，加上佢哋近4仗本土盃賽狂入22球，其中3仗至少贏5粒，火力驚人，讓球主客和讓3球都唔怕辣，直取讓球客勝。