歐聯16強已經開打，幾支下周有份出戰嘅球隊今晚會提早登場，其中意甲榜首祖雲達斯主場迎戰費辛隆尼；祖記目前喺意甲一支獨秀，為留力歐聯大可睇定嚟食，睇番佢哋對上3次聯賽鬥費辛隆尼取得2勝1和，3場總入球都係開2球，今場大細中位數開3/3.5球，入球細可作為過關重心。
（Now 638、有線654及614台周六凌晨3時30分直播）
祖記今季意甲踢咗23場攞到20勝3和，係5大聯賽入面唯一不敗之師，依家佢哋領先第2位嘅拿玻里11分，捧盃相信只係時間問題。祖記歐聯16強對手係西甲勁旅馬德里體育會，踢法一向以硬淨見稱，祖記首回合仲要先作客，既然今場對手只係排尾2嘅費辛隆尼，祖記大條道理作出輪換。費辛隆尼牌面雖然唔及對手，不過佢哋好有自知之明，近年每次遇上祖記都決心死守，好似今季首循環，祖記要到下半場完場前9分鐘先憑基斯坦奴朗拿度打破悶局，埋單小勝2比0，睇番兩隊近3次碰頭，總入球都開2球，今場首選細盤。
拜仁吼大里昂炒鑊「甘」
另外兩關賽事，先講德甲拜仁慕尼黑作客鬥奧格斯堡。拜仁上周3比1擊敗史浩克04，並乘住多蒙特失分，將榜首差距縮窄至5分，就算下周中歐聯要硬撼利物浦都冇得放鬆。不過拜仁歇冬後連續5場都有失波，後防唔穩陣，對住入得又失得嘅奧格斯堡，相信會有唔少入波，捧中位數3.5球入球大。
（Now 670、FOX +、有線651及611台周六凌晨3時30分直播）
最後法甲里昂主場鬥甘岡，里昂下周歐聯會喺主場挑戰西甲勁旅巴塞隆拿，既然連續兩場都喺主場出擊，今場當然希望先贏一仗壯聲威；甘岡月初先喺法足盃輸過畀里昂1比2，而且今季聯賽作客巴黎聖日耳門、里爾、馬賽等傳統勁旅都被大炒，里昂讓球半／兩球照捧上盤。
（Now 639、有線655及615台周六凌晨3時45分直播）