追榜首1分唔夠喉
今午澳職大戰，威靈頓鳳凰主場硬撼聯賽「2哥」墨爾本勝利。勝利上仗輸畀「1哥」珀斯光輝，爭標機會大受打擊，好彩有日本仔本田圭佑傷愈復出，實力有保證，對住表現飄忽嘅鳳凰，贏波冇難度，客勝唔好錯過。
（Now 639、有線615及655台周五下午2時35分直播）
聯賽緊咬「1哥」珀斯光輝嘅勝利，上仗交手以1比2輸波，兩隊分差拉開至7分，喺常規賽只剩9輪嘅情況下，嚟緊仲想爭冠軍真係1分都唔少得。總結上場比賽，托禾倫缺陣肯定對球隊有好大影響，呢位前瑞典國腳嚟緊呢場都好大機會繼續倦勤，好彩抖咗一排嘅日本球星本田圭佑終於復出回歸大軍，有佢喺中場拍板餵波，巴巴路西斯等前鋒肯定受惠，相信佢哋依然有足夠火力搶分。
鳳凰表現飄忽
鳳凰上場作客1比1逼和紐卡素噴射機，近5場聯賽贏得1場，其中前鋒基舒拿繼上月對FC悉尼一役後，上場再喺比賽末段射失12碼，成為球隊失分罪人，令班波士氣大受打擊。況且排名聯賽第6嘅鳳凰，依家拋離第7位嘅紐卡素噴射機成8分，進軍季後賽形勢樂觀，呢場面對勁旅都唔使搏得太盡，寧願捧客勝好過。