歐聯16強首回合好波連場，今晚輪到衞冕嘅「銀河艦隊」皇馬登場，作客硬撼阿積士。
阿積士被稱為「球星的搖籃」，因為呢支荷甲班霸重視青訓，以往培育出告魯夫、雲巴士頓、列卡特、朗奴高文、柏金、史奈達等名將，最新產品有法蘭基迪莊同馬菲斯迪歷特，前者更畀巴塞隆拿「預訂」，下季會加盟。查實阿積士喺前屆歐霸盃殺入決賽，並喺今屆歐聯闖入16強，係近年最佳成績，呢班生牯仔不能小覷。
艦隊大戰經驗勝一籌
不過，歐聯貴為歐洲最高水平嘅球會級盃賽，經驗最為重要，而呢方面皇馬先係專家，唔單止曾13度封王為各隊之冠，近5屆4度捧盃，包括連贏最近3屆，風頭一時無兩。雖然在功勳主帥施丹離隊後，經歷咗一段陣痛期，好彩從二隊提升嘅蘇拿利接手後，「銀河艦隊」終於重上正軌，除咗勇奪世冠盃外，近7仗豪取6勝1和，包括啱啱喺打吡戰勇挫同市死敵馬體會，氣勢如虹。箭頭賓施馬入球不斷外，加里夫巴利亦傷愈復出，呢班功臣經驗豐富，絕對係可恰死阿積士一眾生牯仔，就算作客亦可先拔頭籌。