雖然今晚西甲頭場有「銀河艦隊」皇馬登場，但只係對住下游嘅基羅納，相信實食冇黐牙，反而想講佢哋踏入2月後，真係否極泰來，唔單止喺聯賽慢慢爬番上嚟，未計今輪賽果已升上次席，落後榜首巴塞隆拿6分，後上奪冠唔係冇機。而且喺上周中開打嘅歐聯16強首回合，皇馬亦作客贏阿積士2比1，搶到先機，連同在西盃殺入4強，首回合作客賽和巴塞1比1，3條戰線均表現突出。
由於C朗今季離隊，球迷一度擔心「銀河艦隊」會否沉淪，因為其他主力如沙治奧拉莫斯、馬些路、莫迪歷、賓施馬都唔年輕。查實皇馬早早為換血做定準備，除咗近幾年有青訓新星馬高阿辛斯奧、盧卡斯華斯基斯及馬高斯洛蘭迪崛起外，佢哋亦使近億歐元接連買入丹尼施巴路斯、雲尼斯奧斯祖利亞、巴謙戴亞斯等「潛力股」，大部分都表現唔錯，難怪喺冬窗冇乜行動喇，同昔日只簽球星嘅「銀河艦隊」相比，更為務實。
阿仙奴想翻身要買人
眼見皇馬喺2月勢頭強勁，喺英超嘅阿仙奴則相形見絀。其實以往喺老帥雲格執教時，原本氣勢如虹嘅阿仙奴，每逢踏入2月必定甩轆，估唔到今季改由艾美利領軍，情況未見改善，其中上周中歐霸32強首回合以0比1不敵巴迪最為肉酸。儘管阿仙奴仍屬英超Big 6，但只係Big 6中包尾嗰隊，如今英超競爭咁激烈，就算艾帥本領再大，阿仙奴嘅美國班主高安基若果唔肯使錢買人，遲啲跌出Big 6絕非天方夜譚。