蘇B領軍士氣冚沙利
英格蘭足總盃16強周二凌晨爆發重頭戲，車路士主場火併曼聯。曼聯上場歐聯不敵巴黎聖日耳門，「蘇B」蘇斯克查上任後首次落敗，不過佢賽後冇為輸波搵藉口，態度正面；相反車仔輸畀曼城後士氣低落，領隊沙利及夏薩特又傳不和，內部士氣和曼聯冇得比，車仔讓平半必揀下盤。
（周二凌晨3時30分開賽，馬會網上文字直播）
曼聯上場歐聯16強首回合主場淨吞聖日耳門兩蛋，好多球迷形容呢場敗仗係將蘇B由天堂拉回現實，無可否認，曼聯嗰場比賽無論個人質素、隊形都唔及對手，不過喺連格、安東尼馬迪爾未傷出前，曼聯形勢唔算太曳，就算本身攻勢唔入肉，聖日耳門有威脅攻門亦唔多。最重要係蘇B輸波後態度好正面，坦承曼聯實力的確不及對手，仲叫球員要放眼將來，改善不足尋求進步，呢樣嘢係以前摩連奴執教曼聯時唔會見到，蘇B之所以得民心，咁多人想佢坐正，正正就係呢種正能量與別不同，可以預期呢場敗仗，對曼聯信心打擊唔會太大，反而有可能畀機會蘇B放低「不敗」呢個心理包袱，重新上路。
上場傷出嘅翼鋒連格及安東尼馬迪爾今場肯定缺陣，阿歷斯山齊士踢完歐聯亦報稱受傷，上陣成疑，不過蘇B上任後作客已經6連勝，包括聯賽1比0擊敗熱刺及上圈英足盃以3比1淘汰阿仙奴，鬥傳統Big6未驚過。
車路士搏完歐霸未回氣
車路士上輪聯賽作客以0比6慘負曼城，創下球會自英超成立以來最大比數落敗紀錄，連同之前1場作客輸畀般尼茅夫0比4，2場作客失10球對車仔嚟講絕對罕見，雖然佢哋上場歐霸作客贏馬模2比1，不過表現唔算突出，勝在贏個人質素，而且佢哋比起曼聯少2日時間休息，體力亦有輸蝕。車路士對上5場主場雖然贏晒，但對手分別係英冠諾定咸森林同錫周三，英超護級分子哈特斯菲爾德及紐卡素，就算英聯盃4強次回合擊敗熱刺，對手陣容亦嚴重不整，冇咩說服力，主場讓平半制唔過，何況足智彩讓球盤今季兩次開曼聯受讓少過1球，佢哋都贏盤，波童當然揀下盤。