防線鬥殘好難唔失波
今晚歐聯16強首回合上演超強戲碼，兩支5屆冠軍利物浦、拜仁慕尼黑於晏菲路球場交鋒。紅軍今場後防天殘地缺，為打響頭炮隨時以攻代守；拜仁歇冬後場場比賽有失波，後防亦唔穩陣，今場首選中位數2.5球入球大。
（Now 643、有線616及656台周三凌晨4時直播）
利物浦上屆決賽1比3不敵皇家馬德里屈居亞軍，睇番晉級過程，佢哋喺16強、8強及4強首回合，分別以3球或以上差距擊敗波圖、曼城及羅馬，深明「好嘅開始係成功嘅一半」呢個大道理，加上佢哋今屆分組賽主場全勝、作客全敗，必藉主場之利希望打響頭炮。
雙方同樣攻優於守
不過紅軍今場有多名後防主力缺陣，包括荷蘭中堅華基爾雲迪積克停賽，洛夫雲、祖高美斯亦未傷愈，連可以串演中堅嘅法賓奴泰華利斯賽前都話肌肉拉傷上陣成疑，或者要搵啱啱傷愈復出嘅阿歷山大阿諾特移入中路，天殘地缺好難唔失波，好彩佢哋進攻火力向來有保證，除上季喺歐聯加埋入咗30球嘅「進攻三叉戟」，今季加入梳頓沙基利後更如虎添翼，紅軍近11場主場豪取10勝1和，合共轟入32球，平均每場接近入3球，為掩蓋後防弱點料以攻代守。
拜仁今季表現飄忽，門神紐亞、兩大中堅曉姆斯及謝路美保定不斷受傷患困擾，狀態嚴重下滑，歇冬後聯賽連盃賽6場都有失波，合共失10球，包括上場對奧格斯堡開波13秒閃電失守，集中力嚴重不足；不過佢哋同紅軍一樣前線交到功課，羅拔利雲度夫斯基今屆歐聯入咗8球，現時領先射手榜，法國翼鋒京士利高文上場聯賽個人梅開二度，配合歇冬後喺各項賽事分別攻入3球嘅基拿比及哥列斯卡，有本錢同紅軍鬥攻，中位數2.5球大盤好抵玩。