歐霸32強次回合西維爾鬥拉素周四凌晨提早上演，首回合領先1球嘅西維爾一向靠主場搵食，近7場歐霸主場全勝，而且上周聯賽收起晒賓耶達同沙拉比亞，擺明要搏呢場，相信佢哋可以再藉地利再贏拉素，捧1.7倍主勝。
（Now 643、有線656及616台周四凌晨1時直播）
連同前身足協盃，西維爾過往曾5度稱霸歐霸，經驗相當豐富；上周中首回合，西維爾就憑前鋒賓耶達一箭定江山，作客小勝拉素1比0，呢名法國前鋒近7場歐霸入6球，屢有佳作，火力值得信賴。賓耶達咁掂，教練文治梗係錫住嚟用，喺啱啱輸畀維拉利爾嘅聯賽，賓耶達同另一進攻中場沙拉比亞都冇踢正選，下半場先上陣，養精蓄銳喺今場歐霸盃搏殺。
拉素首回合落後焗攻
另一邊廂，拉素狀態飄忽，近7場僅得2勝1和4負，單計作客，近4戰更只得1勝1和2負，可見射手恩莫比尼受傷影響甚大。查實呢支意甲球隊喺近6場歐霸僅得2勝4負，首回合落後1球，今場為晉級更要焗攻，西維爾嘅反擊戰術大派用場。睇番西維爾喺歐霸盃主場出擊特醒，近7場全勝，其中6場贏對手2球或以上，堪稱「主場龍」，主勝不容錯過。