另一場歐聯16強首回合，英超榜首曼城作客德甲「礦工」史浩克04。曼城狀態弗爆，王牌阿古路士哥停不了，更有快翼利萊辛尼倒戈母會，知己知彼，贏波機會高唱入雲，不過呢場始終只係首回合，加上曼城有英聯盃決賽後顧，讓球半、兩球略嫌多，改捧半場客勝更穩陣。
（Now 643、有線616及656台周四凌晨4時直播）
曼城今季有機會做4冠王，雖然賽程頻密，不過曼城愈戰愈勇，連盃賽在內，近13場贏咗12場，有12場喺上半場領先對手，入局極快，王牌阿古路近3場上陣有2次演出帽子戲法，腳風順到不得了；曼城今場仲有利萊辛尼倒戈，呢名「礦工」青訓產品對母會暸如指掌，相信可將唔少有利情報畀到領隊哥迪奧拿。
史浩克遇英超兵例早失
上季德甲亞軍史浩克04，今季嚴重失準，聯賽已跌落下游位置，而且「礦工」近年喺歐聯對住英超球隊冇運行，近5次對賽只得2和3負，其中3次主場加埋失10球，主場出擊冇甜頭；但考慮到曼城今屆分組賽試過失準輸畀里昂，作客另一支德甲球隊賀芬咸亦險勝2比1，今場讓球半、兩球似乎太多，而且曼城嚟緊周末會喺英聯盃決賽鬥車路士，爭奪今季首項錦標，今場隨時唔去盡；既然史浩克上述5次對英超球隊全部都係上半場落後，曼城近期又旺半場領先，今場捧半場客勝最好路。