未講歐聯之前，我想講講曼聯剛於英格蘭足總盃16強輕取車路士2比0，進身8強。勢估唔到季初好哋哋倫敦雙雄車仔同阿仙奴，踏入季中跌落谷底，今季才執教兩軍嘅沙利及艾美利，與球員嘅蜜月期仲短過普遍夫妻。相反，季初喺摩連奴麾下看似無藥可救嘅曼聯，改由蘇斯克查領軍後，即從谷底反彈，8強又避開同市死敵曼城，隨時去到決賽先上演曼市打吡。本來連場報捷嘅皇馬，喺上輪西甲竟然爆大冷，反輸畀2個幾月未贏過嘅弱旅基羅納1比2，足球引人入勝之處，莫過於此。
至於其同市死敵馬德里體育會，今晚歐聯16強首回合喺主場迎戰祖雲達斯，雖然祖記有C朗助陣下如虎添翼，贏到冇停手，但要留意佢哋近年已壟斷意甲，而且喺今屆歐聯亦輸過畀曼聯，馬體會喺鐵帥施蒙尼領導下一向硬淨，今仗打和唔奇。
同晚另一場歐聯16強，史浩克04主場對曼城，史浩克今季沉淪於聯賽下游，難有野心兼顧歐聯，氣勢如虹嘅「藍月亮」，就算出5名副選亦綽綽有餘，今仗可謂「依絲W」。