留力英聯盃Hea鬥馬模
今晚歐霸盃32強次回合，車路士返主場再鬥馬模。首回合贏波嘅車仔，日前喺英足盃畀曼聯踢出局，嚟緊又有英聯盃決賽大戰曼城後顧之憂，領隊沙利為保帥位，今仗隨時留力，面對聯賽未開咧嘅馬模，隨時合演悶波一場，入球細（2.5球）乃不二之選。
（Now 643、有線656及616台周五凌晨4時直播）
車仔依家處於多事之秋；先講戰績，近8仗只得4勝4負，其中不乏慘吞般尼茅夫4蛋及曼城6蛋嘅恥辱敗仗，日前喺英足盃16強以0比2輸畀曼聯。嚟緊周一凌晨仲要喺英聯盃決賽硬撼曼城，呢場被視為領隊沙利保帥位嘅最後救贖機會，一旦輸埋，呢位意大利教頭將難逃被炒厄運。相比之下，今仗對車仔嘅重要性就冇咁大，畢竟首回合作客贏2比1，領先兼有2個作客入球喺手，今仗和波或輸0比1亦可晉級，加上佢哋今季出戰歐霸盃都係派副選居多，預計夏薩特、希古恩等主力唔會披甲。
藍戰士但求穩陣出線
馬模唔單止實力輸幾條街，而且其所屬嘅瑞典超仍未開咧，狀態唔慌好得去邊，就算想收復失地，恐怕有心無力。當然，車仔都唔想大意畀馬模踢出局咁肉酸，相信今仗會穩穩陣陣，但求保住優勢出線，不致於喺英聯盃決賽前再受打擊，影響士氣，入球細（2.5球）有2.33倍分頭不容錯過。