3大森巴兵對辦
連續兩季日職盟主川崎前鋒，今日下午展開衞冕第一擊，於主場同FC東京合演「多摩川打吡」。前鋒上場於日超盃擊敗浦和紅鑽先拔頭籌，新兵李安度達美奧即有貨交，而且近4季喺日職開咧戰均順利贏波，面對近年交手贏多輸少嘅東京，有力打響頭炮，主勝捧得過。
（有線662及602台周六下午1時直播）
之前經常做二奶嘅前鋒，近2季成功稱霸日職堅難得，今季保留對上2季嘅奪標功臣，除右閘艾辛奴費拉拿轉投清水心跳，其餘主力包括首席射手小林悠、上季日職最有價值球員家長昭博及老將中村憲剛仍在陣中，默契唔使懷疑。
唔只咁，佢哋季前亦引入3名巴西新外援，其中名氣最大嘅前鋒李安度達美奧，即時喺上場日超盃一箭定江山，協助前鋒以1比0擊敗浦和紅鑽捧盃，呢位2012年為巴西奪得倫敦奧運銀牌兼攞埋神射手嘅前鋒，極速融入，另外2名森巴兵謝斯爾及馬堅奴則主力防守，無論攻守戰力都顯著提升。
FC東京「日本美斯」擔正
FC東京上季聯賽排名第6，成績唔差，新季佢哋補入甘美奧前鋒謝爾費拉拿、鳥棲砂岩前鋒田川亨介等新兵外，仲有結束外借由西甲巴塞隆拿回流嘅久保建英，據報今仗呢位有「日本美斯」之稱嘅17歲小將仲會打正選，爭取打破最年輕揭幕戰入波紀錄。不過，FC東京始終有巴西外援連斯利馬、前鋒富樫敬真、中場米本拓司離隊，陣容大變下磨合需時，呢場波實不宜高估。
況且喺往績方面，前鋒近4季聯賽首戰全部贏波，非常搶韁，加上兩軍近4次交手，前鋒亦取得3勝擺明格食格，相信可旗開得勝，主勝有計。