禮拜六東網又有德甲直播，弗賴堡主場對奧格斯堡，弗賴堡歇冬後未贏過，不過表現其實遠比戰果好，今晚主場出擊誓搶新年首場勝仗，奧格斯堡態沉作客差兼傷兵滿營，到下半場更隨時嚴重走樣，今場波東網安排咗英語旁述，基於足智彩有即場投注，黑柴建議大家賽前可以先買一注主勝，到下半場再追弗賴堡贏或下一隊入球。
（on.cc東網周六晚10時30分直播）
弗賴堡今年5戰不勝，但兩場敗仗分別對實力高一皮嘅法蘭克福同賀芬咸，陣上亦敢於同對手鬥攻，近3場和波其實表現都好出色，當中對史特加同禾夫斯堡都靠後勁喺尾段追和，今晚返到主場出擊，教練史特拉治決定喺前線同時派對尼斯彼德臣同尼達列治拿合演雙箭頭，實行強攻奧格斯堡，誓響2019年頭炮。
奧格斯堡換邊後好易散
弗賴堡防線唔齊腳，基斯甸根達上仗補時被逐要停賽，另外兩名守將羅賓高治同古迪爾養傷，不過陣容仍然遠比奧格斯堡整齊，客軍門將盧菲、後防大將古維利奧、翼鋒安達夏恩同首席射手艾費特芬保加臣都因傷缺陣。事實上奧堡狀態同後勁都差，近13場聯賽只喺主場險勝過弱旅緬恩斯，其餘12仗3和9負之餘，當中9場都喺下半場失波，有4場開半和全輸，近3場敗仗單計下半場都輸晒，最慘嘅係今仗幾名主力都唔弗，正選史迪菲尼迪斯同停滿復出嘅10號仔丹尼爾拜亞，仲有後備莫拉域克都有傷在身，捱到下半場隨時頂唔順。今晚大家到下半場睇到弗賴堡對辦嘅話，即場投注追主隊應有斬獲。