周六澳職嘅焦點，就梗係「墨爾本打吡」啦！主隊墨爾本勝利嘅箭頭托禾倫近日宣布傷愈，問題係久疏戰陣狀態難保證，加上佢哋對親墨爾本城不嬲都鬥得難分難解，估計今場雙方都唔敢冒進，半場和好路。
（Now 638、有線614及654周六下午4時50分直播）
本田傷愈冇耐未夠fit
勝利喺前鋒托禾倫帶領下走勢強勁，可惜呢位前瑞典國腳近期傷出之後，表現即刻走樣，包括早前喺榜首大戰1比2不敵珀斯光輝。雖然托禾倫康復進度唔錯，據報今仗仲可以候命，不過就未必返到最佳狀態。同時，佢哋另一王牌本田圭佑，雖上仗射入12碼，但其實都喺啱啱先好番晒，狀態未到top fit，相信勝利呢場開局都會先以鞏固防線為主。
墨城近況麻麻，近4場只得1和3負，呢場肯定希望喺同城打吡博反彈，早前由蘇超回流嘅前鋒占美麥卡倫，近2場為球隊上陣都有波入，狀態有番咁上下，可以保證打吡戰唔會任人魚肉。睇番往績，近4次墨爾本打吡有3次開半場和，呢場兩隊為啖氣肯定唔希望輕易輸波，捧番半場和好過。