今晚英超Big 6只有熱刺登場，佢哋將於頭場造訪般尼。熱刺開波前迎來好消息，抖咗超過1個月嘅神鋒哈利卡尼全面復操，今場大有機會後備上陣，領隊普捷天奴本身已有狀態極勇嘅孫興民打天下，依家仲多咗籌碼撳掣，勝算更高。般尼遇強即屈，今季主場對Big 6球隊利物浦、車路士及曼聯全敗，熱刺客勝有買趁手。
（Now 621周六晚8時30分直播）
先唔講「哈神」哈利卡尼嘅回歸，熱刺淨係一個孫興民，都已經夠令般尼後防頭痕。呢名南韓王牌自戰罷亞洲盃歸隊後，不但未見疲態，反而愈踢愈醒神場場有士哥，近4戰勁轟4粒，腳風超順，帶領球隊取得4連勝，3場聯賽對屈福特、紐卡素同李斯特城贏波可以話正常發揮，最重要係上周中歐聯16強首回合3比0擊潰多蒙特，堪稱代表作，士氣非常高漲。今場熱刺仲有哈利卡尼已傷愈候命，陣容及火力更強，領隊普捷天奴賽前記招表示，10日前「哈神」話自己已經可以上陣，不過佢想呢名英格蘭前鋒抖足先搏殺，今場會先作後備，呢番說話可以理解為，普帥對其他球員信心十足，即使唔用「哈神」都夠殺。
般尼主場「欺善怕惡」
般尼雖然近況冒升，但今季主場「欺善怕惡」，對Big 6球隊全部輸晒。而且熱刺對般尼格外醒神，近5次交手獲4勝1和，今季更係英超