歐霸雙殺過關士氣高昂
周六晚西甲焦點戰，西維爾主場硬撼「1哥」巴塞隆拿。西維爾雖然近期聯賽走勢麻麻，不過主場威力猶在，加上周中歐霸成功淘汰意甲勁旅拉素，士氣返晒嚟，對住近況唔算樂觀嘅巴塞，絕對頂得兩嘴，西維爾受讓必揀「讓球主勝」。
（Now 632周六晚11時15分直播）
暫列積分榜第4位嘅西維爾近排聯賽表現跌Watt，近3仗未贏過波頻頻失分，現時畀第5嘅基達菲追到只差1分，歐聯席位危危乎。不過，佢哋喺周中歐霸就大打爭氣波，主場2比0擊敗意甲拉素，兩回合計以3比0「雙殺」過關，士氣即時唔同晒。
其實，西維爾係一支典型主強客弱球隊，喺主帥柏保路馬捷恩帶領下，今季11仗聯賽主場取7勝3和1負，包括以3比0擊敗皇家馬德里同1比1守和馬德里體育會。如果計埋西班牙盃同歐霸就仲誇張，21場主場16勝3和2負，不敗率超過9成，連今仗對手巴塞都衰喺佢哋手上，可見比斯祖安球場呢個「地獄主場」絕非浪得虛名。
中場核心班尼加復出
值得一提嘅係，今仗西維爾中場核心班尼加，坐咗兩場波監後復出，有埋呢位阿根廷球星派牌，要喺巴塞身上攞分絕對「不是夢」。
另一邊廂，巴塞隆拿最近陷入小低潮，近5場只取1勝，以「地上最強」嚟講絕對不能接受。究其原因，主要同一班世界級攻擊手突然啞火有關，除咗蘇亞雷斯喺呢5場食白果外，早前傷愈復出嘅球王美斯，都明顯未回復最佳狀態，近4仗只係靠12碼入得1球。加上巴塞今季作客明顯冇以前咁sharp，近5仗作客取1勝2和2負，成績毫無說服力，呢場面對強敵都好難全身而退，寧願捧讓球主勝好過。