今晚歐洲足球好波浪接浪，英格蘭聯賽盃決賽——車路士對曼城。記得我喺4年前亦曾赴英睇決賽，咁啱都有車仔份，當年佢哋喺摩連奴麾下，以2比0輕取熱刺，勢估唔到經歷4載，車仔已用咗3名領隊，從不斷捧盃到風雨飄搖，如今撞正所向披靡嘅曼城，好難樂觀。
講到最矚目之戰，必屬英超雙紅會——曼聯坐鎮奧脫福迎戰死敵利物浦。兩軍教頭蘇斯克查同高普嘅對決，猶如孔明鬥周瑜，關鍵在於誰先洞悉對手策略，採取針對性部署。與接手曼聯冇耐嘅「蘇B」唔同，高普嘅高度壓迫加快速反擊戰術，早已成為利物浦標誌，前線3把利刀更令對手聞風喪膽。
不過，正所謂「你有張良計、我有過牆梯」，好似上周中歐聯16強首回合，防中出身嘅拜仁主帥尼高高華，大打中場逼搶，派出巴斯克悍將查維馬天尼斯在4人防線前做掃蕩，加上眾將一失控球權即就地反搶，成功守和紅軍0比0。到底「蘇B」會沿用搶攻打法，抑或先鞏固防守，將會成為鍾意鑽研戰術嘅球迷一大看點。