兩紅相遇曼聯下盤有利可圖
周日晚上英超「雙紅會」大戰，曼聯主場挑戰「2哥」利物浦。想喺曼城手上搶番榜首位置嘅「紅軍」，近期聯賽頻頻失分狀態認真麻麻，呢場仲要作客面對魔性返晒嚟嘅曼聯，隨時再有閃失，今場客隊利物浦仲要讓平半，必吼曼聯下盤。
（Now 621周日晚上10時05分直播）
經歷聯賽上半程災難般嘅表現之後，相信唔少紅魔球迷已經對愛隊戰績唔再抱有太大期望，勢估唔到自從名宿蘇斯克查接手球隊之後，魔性即時返晒嚟，尤其喺本土賽事戰績堪稱所向無敵，聯賽連英足盃近12場比賽豪取11勝1和，其中就先後擊敗熱刺、阿仙奴同車路士三支Big 6，面對另一勁旅利物浦一樣冇有怕。
同時，曼聯同利物浦嘅敵視程度，不嬲比起同市死敵曼城有過之而無不及，之前摩連奴就係作客以1比3輸畀利物浦後落鑊，蘇斯克查作為「紅魔人」，深知「雙紅會」嘅意義，呢場肯定唔會留手，如果「蘇B」可以帶隊贏到「紅軍」，絕對會為自己坐正曼聯帥位贏得唔少籌碼。
利物浦撼完拜仁體力輸蝕
利物浦暫時同榜首曼城同分，但踢少1場，僅以得失球差屈居第2位，呢場只要有分落袋即可搶番1哥位置，不過紅軍啱啱周中喺歐聯同拜仁慕尼黑上演惡戰，球員體能肯定要比曼聯輸蝕。況且紅軍近期作客表現跌Watt，近4仗作客取1勝1和2負。再加上球隊最後一次喺曼聯主場奧脫福贏波，已經要數番去2014年，之後5次作客僅取2和3負，呢場再臨凶地睇怕都好難攞到甜頭，曼聯主場受讓平半，冇理由唔捧下盤。