雙藍爭霸曼城撳住劏殘車
今晚溫布萊球場上演英格蘭聯賽盃決賽，由車路士對曼城。車路士正面對近年最大危機，但班主、領隊、球員以至球迷卻未能團結一致，未踢個勢已輸咗大截。反觀曼城領隊哥迪奧拿捧盃經驗豐富，相信今次可繼兩星期前再次力壓車仔，曼城讓半一，樂比撐上盤。
（周一凌晨零時30分開賽、馬會網上文字直播）
車路士自班主阿布拉莫域16年前入主以來，經歷過無數嘅危機同低潮，但從來冇今次咁嚴重，領隊唔啱用好閒，反正隔一兩季換領隊係平常事，最大危機係阿布對搞波嘅熱情已逐漸冷卻，由於英俄關係緊張，令阿布喺英國處處受到掣肘，近日更不斷傳出賣盤嘅消息，所以國際足協禁止車仔喺未來兩個轉會窗轉會操作，其實影響真係唔大，因為車仔本身已唔多想買人，最多咪收番一大批借將自用。
沙利一成不變最攞命
今季先初嚟甫到嘅領隊沙利，季初本來被寄予厚望，可惜佢嘅「沙利球」未能在英超發揚光大，佢多次埋怨球員唔能夠充分理解佢嘅意念，更直言夏薩特欠缺領袖魅力，多番惹火言論都令到更衣室關係緊張。不過沙利嘅致命傷係太堅持自己一套，而且永遠冇Plan B，即使兩周前對曼城半場已輸緊4球，仍然唔見佢有咩對策，結果埋單輸夠6粒。係人都知佢換人永遠係位換位，今季已經20次由巴克里入替高華錫，再唔係就基奧特換希古恩或柏度換韋利安咁，完全一成不變，車路士今季對Big6球隊成績差劣，尤其係離開主場已4連敗，一球波都入唔到，可見其他強隊已睇穿晒車仔嘅戰術。
曼城今季對Big6成績突出，共6勝1和1負，哥迪奧拿更可以話係捧盃之王，職業生涯已贏得20個獎盃，淘汰賽更係經驗豐富，11次入決賽贏咗10次，唯一一次失利係2011年西班牙盃決賽，反觀沙利教咗咁多年波，係首次殺入盃賽決賽，捧盃經驗係零，從各方面去分析，車仔今場都好難可扭轉劣勢。