德甲獨腳戲，RB萊比錫主場迎戰賀芬咸，兩軍一向都係進攻足球擁護者，近期前線亦着晒火，不過防線同樣遇到唔少問題，而且兩軍為爭下屆歐戰席位都不甘和波，今晚兩支同樣攻強守弱球隊對決注定係入球騷，黑柴推介有兩倍嘅中位數3.5球大盤。
（Now 670、有線651及611台周二凌晨3時30分直播）
兩軍上輪都喺弱旅身上攞足信心，萊比錫作客贏史特加3比1，弗爆射手尤素夫保臣梅開二度，當家射手迪姆華拿亦貢獻助攻，配合弗爆嘅沙比薩同新星干拉特賴馬等攻擊手，主場出擊火力有保證，不過防線支柱烏柏美卡奴仍然養緊傷，今仗攻得急未必可以保住不失。
迪米亞巴爾撐起賀軍火力
賀芬咸情況相近，上輪派3蛋輕取漢諾威根本贏得少，皆因全場仲有3次射中門框，好運啲隨時炒半打，今季冒起嘅箭頭貝科迪爾愈戰愈勇，佢拍住卡拉馬歷同祖連頓組成賀芬咸三叉戟，今季喺德甲合共入咗22球，球隊仲唔係靠晒佢哋入波，英格蘭優質小將雷斯尼爾遜同埋喺後備席上嘅強力中鋒施沙拉爾一樣有火，不過全隊最煞食嘅係中場迪米亞巴爾，呢位串連攻守嘅無名英雄至係前線幾台大炮嘅火力泉源，不過由於踢法開放，佢哋作客係前10名球隊中失波最多一隊，球隊目前聯賽榜排第8位，想踢下屆歐霸要全力追分，好在各項盃賽已畢業可以專心聯賽，今晚必定會同萊比錫駁火爭勝。
睇番雙方歷來5次聯賽交手，總入球都係3球或以上，當中3次達到4球或以上，包括上季賀芬咸作客贏5比2，今晚重臨萊比錫嘅紅牛球場，注定又係一場入球騷。