周三凌晨意大利盃4強首回合，拉素主場火併AC米蘭。呢場波我哋安排咗「黑龍波」郭子龍同「蘇雞」蘇肇朗負責評述。拉素一班前鋒前鋒近期陷入入球荒，嚴重影響球隊表現，相反波蘭射手比亞迪克加盟AC米蘭之後，火力有爭無減，有力帶領「紅黑軍團」反客為主，客勝好路。
（on.cc東網周三凌晨4時直播）
AC冬季轉會窗執到寶！講緊嘅係由熱拿亞來投嘅前鋒比亞迪克，呢位年僅23歲波蘭射手除咗令人難忙嘅招牌式交叉手雙搶入波慶祝動作外，最搶鏡仲有超高入球效率。
比亞迪克弗過恩莫比尼
加盟AC後，比亞迪克表現十分搶鏡，近5次正選上陣場場有波入，共轟7球，其中就包括意盃8強次回合個人梅開二度幫助球隊淘汰勁敵拿玻里，相信呢位波蘭小將有力再次擔起「A米」進攻大旗。
另一邊廂，早前有主力前鋒恩莫比尼傷出嘅拉素，焗住要用厄瓜多爾前鋒卡些度，可惜效果麻麻，近期恩莫比尼終於傷愈復出，可惜表現大不如前，連續2場都食白果，上仗更連累球隊歐霸遭西維爾淘汰，今季歐戰之旅遺憾告終，士氣大受打擊。各項賽事慘吞3連敗嘅拉素，呢場面對強勢來襲嘅AC米蘭隨時難以招架，今場建議捧番客勝好過。