今晚西盃4強次回合續演國家打吡，輪到皇家馬德里返主場迎戰衞冕嘅巴塞隆拿，亦係今季第3次國家打吡。首回合皇馬作客逼和巴塞1比1，搶到1個作客入球略佔先機，不過巴塞有美斯助陣火力勁爆，而且今屆西盃多次上演絕地反擊，今場必狂攻博出線，加上「地上最強」近年造訪巴拿貝球場常演大騷，捧2.5球嘅入球大最正路。（周四凌晨4時開賽）
美斯弗爆作客照攻
今季首次國家打吡，皇馬作客巴塞慘敗1比5，時任教頭洛佩特吉隨即落鑊，「新艦長」蘇拿利貴為皇馬名宿，梗係知國家打吡嘅重要性，佢帶隊喺西盃4強首回合作客逼和巴塞1比1，今場回師主場再戰死敵，雖然0比0都可晉級，但以「銀河艦隊」近5場皆有失波嘅防線，絕對唔會玩死守。皇馬新星雲尼斯奧斯祖利亞愈踢愈順，夥拍重拾射門鞋嘅賓施馬，隨時以攻代守。
衞冕冠軍巴塞上場聯賽作客西維爾，喺落後情況下反勝對手4比2，球王美斯連中三元弗到漏油，加埋蘇亞雷斯同奧士文尼迪比利支援，勢必火力全開。「地上最強」今屆西盃常演絕地反擊，之前2圈對利雲特同西維爾，都喺首回合落後下反勝晉級。何況巴塞近7次作客鬥皇馬6次開3球或以上，2.5球嘅入球大乃不二之選。