周四凌晨英超快車爆發倫敦打吡，啱啱喺聯賽盃決賽輸波嘅車路士，於史丹福橋球場硬撼熱刺。喺聯賽盃出晒醜嘅車路士，領隊沙利現時十足被架空，車仔儼如「無人駕駛」，軍心不穩，相反熱刺傷疲盡起，射手哈利卡尼上仗已復出上陣，加上近年交手佔上風，今場一定趁機打落水狗，受讓必捧下盤。
（Now 621周四凌晨4時直播）
未講波先講吓兩隊消息，喺聯賽盃決賽公然違抗指令、唔肯離場嘅門將阿列沙巴拿加，事後公開道歉，雖然搞到咁大鑊，但就只被罰一個星期人工，捐去車路士慈善基金了事，球會唔會有其他跟進，亦唔會影響到佢正選位置。相反熱刺領隊普捷天奴可能麻煩啲，上場聯賽1比2不敵般尼後，佢走入球場鬧球證甸恩，英足總會喺當地時間今日下午6點進行聆訊，有可能要被罰即時停賽，今場對車路士要做座上客。
熱刺往績佔優受讓筍
不過，熱刺近排憑住南韓前鋒孫興民不斷士哥，總算捱過早前哈利卡尼、迪利阿里因傷倦勤嘅困境，帶領這支北倫敦球隊近5戰4勝，雖然上仗輸波，但「哈神」哈利卡尼復出仲即刻有波入，球隊攻力有增無減。翻查紀錄，兩軍近4次正面交鋒，熱刺取得3勝1負佳績，擺明格食格。
車仔主帥沙利被炒傳言甚囂塵上，相信只係時間問題，即使擁有希古恩同佐真奴費路兩名「子弟兵」，但二人明顯未能融入原本班底，今場隨時係球員夾計送走沙利嘅一戰，即使主場都冇優勢，熱刺受讓值得捧場。