周四凌晨繼續有意盃送上，4強首回合費倫天拿主場火併阿特蘭大。費倫近期頻頻同對手演入球騷，面對有進攻好手艾真度高美斯復出嘅阿特蘭大係對攻好戲，入球大係不二之選。今場波我哋仲請嚟費倫天拿球迷會代表同我哋一齊睇好波。
（on.cc東網周四凌晨4時直播）
主隊費倫各項賽事近9仗不敗，不過只贏得4場，其餘全部和波，皆因後防甩漏多，上仗聯賽面對國際米蘭，費倫開波冇耐就領先，畀對手連入3球，好彩一班攻擊手夠爭氣追番2球，最終和3比3，加上球隊早前於8強曾以7比1橫掃羅馬，絕對係典型攻強守弱嘅球隊。呢場隊長兼後防核心謝文比薛拿繼續有傷倦勤，防線依然隱患無窮，相信「紫百合」都會以攻代守，靠基奧雲尼施蒙尼等前鋒揾食。
雙方8強戰大炒勁旅
阿特蘭大雖然近期狀態有所回落，不過佢哋喺早前8強都曾爆出驚喜賽果，以3比0淘汰衛冕嘅祖雲達斯，球隊實力絕對不容小覷。值得留意，隊中阿根廷攻擊核心艾真度高美斯已經傷愈歸隊，有呢位矮腳虎喺中場派牌，阿特蘭大進攻瓣數即刻豐富唔少，尤其近14次上陣狂轟18球嘅哥倫比亞射手杜雲沙柏達喺前場肯定受惠。呢場兩隊攻力強勁嘅球隊相遇，一班球迷絕對可以買定花生等睇入波。