周五凌晨起各大盃賽激戰連場，等阿King同大家分享過關心水。其中周五凌晨西班牙盃4強次回合，華倫西亞將返回主場火併貝迪斯；華倫近期火力疲弱，對住表現硬淨嘅貝迪斯隨時再次啞火，中位數2.5球細盤要得過。
狀態飄忽嘅「蝙蝠軍團」，首回合同貝迪斯打成2比2，搶得2個寶貴作客入球，形勢稍佔優，今次主場出擊肯定會踢得比較保守。況且華倫一班前鋒狀態認真麻麻，球隊近3仗主場雖然未輸過，不過只係入過1球，其中主力前鋒洛迪高摩連奴已經連續4場冇波入，深陷入球荒，料有作客入球在手嘅華倫今場會踢穩守突擊，實行睇定嚟踢，中位數2.5球入球細值博。
阿特蘭大聯絕地「大」反擊
去到周五朝早，自由盃第3圈外圍賽次回合，首回合贏1比0嘅巴拉圭球隊利伯泰迪，攞住領先優勢作客對哥倫比亞球隊國民體育會，肯定唔會搶攻，球隊近4仗自由盃全開半場和，值得再追。最後有中冠盃16強次回合，阿特蘭大聯首回合不敵哥斯達黎加球隊希雷迪亞洛1比3，但呢支美職王者主場向來特別醒神，睇好佢哋成功反撲收復失地，捧入球大啱數。