近4對賽3勝1和
今晚日職重頭戲，上季盟主川崎前鋒主場火併上季季軍鹿島鹿角。兩軍皆首輪失分兼有兼顧亞冠盃之憂，不過前鋒狀態明顯較弗，而且近年聯賽交鋒食住鹿角，今仗可藉地利打開今季聯賽勝利之門，1.95倍主勝抵玩。
（周五晚6時開賽、馬會網上文字直播）
季前勇奪日超盃嘅川崎前鋒，喺首輪聯賽落筆堅立油，作客畀死守嘅FC東京悶和0比0；查實川崎發揮唔係差，只係FC東京門神林彰洋屢救險球先至搞到失分。川崎仍以中場中村憲剛、家長昭博及射手小林悠為重心，默契純熟，配合巴西新兵李安度達美奧，實力更強，而且川崎向來重視聯賽，就算下周中亞冠盃分組賽要出戰上海SP，今場亦未必會留力。
鹿角留力亞冠盃
另一邊廂，鹿角喺首輪聯賽爆大冷，主場以1比2輸畀升班球隊大分三神，兩大中堅鄭昇炫及太飼智地接連犯錯，成為輸波關鍵，尤其係後者成日慌失失，早已係防線計時炸彈，兼且鈴木優浩要養傷近兩個月，三竿健斗剛啱先復操，中前場配搭未算完整，想偷雞亦有心無力。作為上屆亞冠盃盟主，鹿角喺下周中亞冠盃分組賽要對柔佛DT，今場或有所保留。加上兩軍近4次聯賽對碰，川崎取得3勝1和，格食格味濃之下，川崎可望贏波主場威番鋪，主勝不容錯過。