卡尼復出熱刺進攻仲亂
今晚英超頭場上演北倫敦打吡，由熱刺主場對阿仙奴。熱刺頂咗大半季，兵源不足嘅問題終於浮現，近日多線作戰下聯賽連敗，莫講話爭冠，連「3哥」地位都難保；近況回勇嘅阿仙奴追追下只係差熱刺4分，有力藉今仗進一步拉近距離，樂比撐「兵工廠」1.8倍讓球客勝。
（Now 621周六晚8時30分直播）
同列強相比，熱刺喺冇乜買人嘅情況下都入到前3，各界對領隊普捷天奴嘅領軍能力讚不絕口，但經過大半季洗禮後，球隊近況明顯下滑，上兩仗先後輸畀般尼同車路士可謂亮起警號，好似周中作客車路士，竟然冇一腳射門中龍，係普捷天奴執教以嚟嘅第1次，進攻明顯出問題，捷比亞「送大禮」亦成為球迷笑柄。
熱刺對Big 6戰績差劣
事實上傷兵問題近期一直困擾熱刺，迪利阿里同艾歷迪亞繼續養傷，維頓漢亦因傷周中避戰，今仗上陣成疑，更大鑊係王牌「哈神」哈利卡尼傷愈復出後，同隊波嘅配合格格不入，進攻上反而冇早前「老孫」擔大旗時咁順暢。熱刺今季喺Big 6較量亦令人失望，7次聯賽交手輸咗5次，阿仙奴雖然亦唔標青，但起碼保持5成不敗率，受讓有一定着數。
暫列第4嘅阿仙奴聯賽3連勝，當中包括周中大炒般尼茅夫5比1，自中場核心奧斯爾解凍後，阿仙奴勢頭愈嚟愈好，射手拿卡錫迪及奧巴美揚亦明顯生猛晒，阿仙奴嘅進攻能力唔使懷疑，唯一擔心嘅都係防線，皆因佢哋今季聯賽作客13場全部有失波，而且超過一半以上都唔止失1球，今場除讓球客勝外，大盤都係唔錯嘅選擇。