今晚尾場壓軸戲，慕遜加柏主場火併拜仁慕尼黑，拜仁近季喺慕遜加柏身上吃盡苦頭，除咗近4次作客普魯士公園球場只得1勝外，首循環主場出擊竟然都吞咗慕遜加柏3蛋，絕對係奇恥大辱，今晚必趁歐聯休戰可以集中精神備戰，全力爭勝力追榜首多蒙特之餘，亦要向慕遜加柏大報復，遇啱主隊近期狀態嚴重走樣，拜仁讓一球要撐上盤。
（on.cc東網周日凌晨1時30分直播）
拜仁上輪主場幾經艱苦以1球險勝哈化柏林，維持同榜首多蒙特僅3分差距，要知道今季哈化遇強愈強，拜仁能夠成為首支擊敗佢哋嘅前3名球隊已經收貨，球隊喺過去同嚟緊嘅周中都唔需要比賽，有更多時間準備今仗，教練尼高高華亦終於從善如流，畀級數經驗都頂級嘅查維馬天尼斯擔正防守中場，佢喺對利物浦嘅歐聯表現固然搶鏡，上輪對哈化仲為球隊奠定勝局，拜仁終於搵啱中場陣容，雖然今仗幾名翼鋒洛賓、列貝利同京士利高文因傷缺陣，但湯馬士梅拿同基拿比級數都唔使懷疑，加上近期復受重用嘅占士洛迪古斯派牌，箭頭羅拔利雲度夫斯基唔憂冇供應。
慕遜加柏嚴重跌Watt
慕遜加柏開季後一直穩定，但踏入二月忽然大跌Watt，前線三叉戟杜根夏薩特、史甸度同柏利亞齊齊冇貨交，中後場球員狀態亦突然下滑，令呢支原本喺主場9戰全勝嘅「主場王」，喺主場連續兩場慘吞3蛋，對手仲係攻力唔算強嘅哈化柏林同禾夫斯堡，陣上完全進退失據，表現之差可以用得人驚嚟形容，相信教練赫基需要時間重拾戰將信心，喺呢個時候遇上回起嘅班霸拜仁注定冇運行啦！