3日前炒起皇馬
西甲國家打吡Round2一觸即發！「銀河艦隊」皇家馬德里會喺周日凌晨主場迎戰巴塞隆拿，呢場係雙方4日內第2度交手，上場巴塞喺西班牙盃4強次回合作客大勝3比0，贏得充滿說服力，以皇馬今季表現，匆匆再戰好難有突破性演出，平手盤繼續撐巴塞。
（Now 632周日凌晨3時45分直播）
皇馬目前喺西甲排第3，唔單止落後巴塞9分，連2哥同市宿敵馬德里體育會都不如，要問鼎聯賽錦標機會相當渺茫，佢哋上場聯賽多得VAR「眷顧」，先至憑兩個12碼險勝利雲特，再睇埋之前一仗聯賽，竟然喺主場倒灶以1比2輸畀賽前10場不勝嘅基羅納，可見皇馬今季聯賽表現幾咁不濟。
講番周中嗰場西盃4強次回合，巴塞憑蘇亞雷斯梅開二度，加上華拉尼嘅烏龍波，作客以3比0大勝皇馬，兩回合計贏4比1進身決賽，不過最大功臣可能係法國小將奧士文尼迪比利，因為巴塞頭兩個入波，都係靠佢先後喺左、右兩邊傳中，加盟巴塞以來表現愈踢愈好，加上美斯上場聯賽對住西維爾更交出「球王級」演出，喺球隊兩度落後下連中三元，帶領巴塞反勝4比2，狀態一流。
近5次訪巴拿貝贏4場
睇番巴塞最近5次作客巴拿貝只輸一次，當時係上季初嘅西班牙超級盃，其餘4次聯賽加盃賽，巴塞全部贏晒之餘，每場更至少轟入3球，完全無懼對手主場威勢，平手盤必捧巴塞。