首輪焦點
周日早上美職首輪大戰，洛杉磯銀河將會主場鬥芝加哥火燄。火燄上季防線疲弱，今季可唔可以有改進都好難講，尤其球隊過往面對銀河經常演入球騷，今仗以伊巴謙莫域為首嘅一班銀河攻擊手實有不少發揮空間，入球大值博。
火燄後防未執掂
上季深受板櫈深度不足問題困擾嘅火燄，表現令人失望，尤其後防人手長期不足，逼住頭號球星舒韋恩史迪加經常要客串踢中堅，大大削弱呢位前德國世盃冠軍中場嘅作用，今季球隊由葡超勁旅士砵亭引入巴西後衞馬些路，應該有望解放「小豬」回歸中場，不過新兵初到美職仲需要時間適應，未必可以即刻改善火燄嘅防守問題。
上季同季後賽資格擦身而過嘅銀河，陣中依然星光熠熠，其中頭號球星伊巴謙莫域雖然已經37歲高齡，不過應付美職絕對綽綽有餘，上季瑞典前鋒常規賽就獨取22球，高踞射手榜次席，加上有墨西哥孖寳杜斯山度士兄弟助陣，火力唔講得笑。尤其銀河近5仗主場對火燄4次開3球或以上，呢場兩隊有望再出現對攻局面，入球大唔好錯過。