「魔性」繼續入侵美職！新一季美職聽朝又開鑼喇，雖有韋拿、基奧雲高等離開遠赴亞洲養老，不過隨着「C朗師弟」拿尼加入，聯同原有嘅伊巴謙莫域、朗尼及「小豬」舒韋恩史迪加，4大昔日曼聯球星聚首一堂，佢哋個個都唔係嚟Hea，呢場美職「紅魔內戰」勢必風起雲湧。
拿尼投奧城超晒班
當上月奧蘭多城宣布簽入拿尼後，好多人都慨嘆C朗仲打緊意甲同歐聯，而呢位「C朗師弟」已經要去美職頤養天年，但你咪理，拿尼今季效力士砵亭，上陣24場有8球進帳，仲有貨賣，依家佢只係32歲，應付美職可謂綽綽有餘。講到呢4大紅魔球星，最有資歷梗係33歲嘅朗尼喇，佢效力曼聯長達13年，同其他3人做過隊友之餘，亦以253球成為紅魔史上士哥王，雖然喺曼聯生涯末期被嘲「月巴」，但佢上季加盟華盛頓聯隊即刻嚟料，短短半季就攻入12粒，帶領原本東岸排下游嘅華聯殺入季後賽，唔講得笑。
與朗尼、拿尼效力曼聯時贏過英超同歐聯等錦標相比，34歲嘅舒韋恩史迪加嘅紅魔生涯堅悽慘，首季傷多過踢，次季更畀時任主帥摩連奴貶落預備組，對於呢位2014年德國奪世盃功臣嚟講，可謂奇恥大辱，之後「小豬」亦意興闌珊，喺2017年3月轉投芝加哥火燄，不過火燄戰績麻麻，上季於東岸排尾2，「小豬」又被迫改打唔擅長嘅中堅，表現自然大打折扣。
37歲伊巴謙莫域仲有貨賣
論到性格巨星，伊巴謙莫域一定有份，2016年佢以34歲之高齡加盟曼聯，神奇地喺53場轟29球，協助紅魔連奪社區盾、英聯盃及歐霸盃「小3冠」。上年因自知未能重拾最佳狀態，伊巴毅然離開歐洲，轉投洛杉磯銀河，並轟入22粒，當中不乏離門35碼超級遠射等高難度士哥，雖則未能闖入季後賽，依然力壓朗尼當選美職最佳球員，就算有傳AC米蘭想搵佢回巢，呢位37歲神箭講到明，喺銀河仲有目標未完成，可見佢想征服美職嘅鬥心。4大昔日曼聯球星聚首美職，呢齣「紅魔內戰」不容錯過。