除咗西甲國家打吡，意甲亦有「首都打吡」——拉素對羅馬。羅馬挾4連勝氣勢鬥拉素，而且今場只係掛名作客，同樣喺奧林匹高球場作賽，唔會影響表現，羅馬攻擊點多，迪斯高、艾沙拉維、高拉洛夫同尼高路辛尼奧路近仗輪流士哥，面對近4戰只得1和3負嘅拉素，平手盤絕對要捧場。
（Now638、有線614及654台周日凌晨3時30分直播）
「首都打吡」向來場外場內都多新聞，就喺今場比賽前兩日，市內多處出現反猶太主義塗鴉，羅馬市警方要嗱嗱聲搵人清潔。兩軍都有好多極端主義球迷支持，所以「藍鷹」對「雌狼」勝負嘅重要性，猶如邊隊先至可以代表羅馬市嘅強者。
拉素近4仗死晒火
不過，論到雙方近況，羅馬似乎更勝一籌，開波前佢哋正式從阿特蘭大買斷中場白賴仁基斯坦迪，中前場調配更得宜。球隊連歐聯在內取得4連勝，合共射入10球，中前場明顯上晒力，相反拉素近4場1和3負，合共只入得1球，前鋒忘記帶射門鞋，好難頂住羅馬。