周一凌晨意甲重頭戲，聯賽榜「2哥」拿玻里主場迎戰「1哥」祖雲達斯。睇排名呢場雖然係榜首大戰，不過拿玻里已落後祖記13分，要從後趕上難過登天，更何況拿玻里嚟緊周中要踢歐霸16強首回合，今場留有一手絕對唔出奇，祖記受讓必捧讓球客勝。
（Now 638、有線654、614、662及602周一凌晨3時30直播）
呢場雖然係聯賽榜2哥鬥1哥，不過雙方差距多達13分，除非祖記餘下13場聯賽離奇失準，否則祖記完成8連霸相信指日可待。由於排第3嘅國際米蘭周六凌晨作客1比2不敵卡利亞里，拿玻里依家領先國米9分兼踢少1場，亞軍位置基本上好穩陣。
拿玻里歐霸前例留力
嚟緊周中拿玻里會喺歐霸盃16強首回合主場鬥奧地利班霸薩爾斯堡，睇番佢哋對上一圈歐霸32強賽事，主、客兩回合前一輪聯賽同以0比0打和費倫天拿及拖連奴，所以話佢哋今場有機會留力，絕對有根有據。
相反祖記周中唔使踢歐聯可以全力以赴，而且佢哋上場聯賽作客1比0險勝博洛尼亞，成功破紀錄成為意甲史上首支頭25輪攞到22勝嘅球隊，氣勢完全冇走樣；再者，祖記目前仲係歐洲5大聯賽唯一不敗之師，水準穩定可見一斑，佢哋同拿玻里嘅13分差距，正好證明咗兩軍實力差距，祖記今場竟然仲有得受讓，讓球客勝咪錯過。