周日晚英超除咗默西賽德郡打吡，較早開波仲有一場倫敦打吡車路士作客鬥富咸。富咸今季攻不銳、守不穩，就算炒咗主帥雲尼亞里亦無補於事；車仔近期亦處動盪之秋，同樣需要力爭贏波重建信心，車路士讓一球，波童捧上盤。（Now 621周日晚10時05分直播）
富咸上周中喺護級6分波輸畀修咸頓0比2，唔計昨晚比賽，排尾2嘅富咸已經落後尾4嘅修咸頓10分，護級機會愈來愈渺茫，球會賽後決定辭退上任僅106日嘅領隊雲尼亞里，改由前英格蘭國腳柏加擔任看守領隊。柏加喺2017年夏天掛靴後，曾在熱刺執教U18青年軍，上年夏天加盟富咸出任前領隊祖簡奴域副手，今次係佢人生首次坐正執教一隊，有幾多料大家心中有數。
富咸失球冠絕英超
富咸今季28場聯賽失63球，無論失球數字及得失球差都係全英超最差，而且佢哋踏入2019年後，聯賽加盃賽近9場輸8場，其中最近4場全部淨輸2球或以上，信心、狀態都低到谷底，最慘富咸未來3輪聯賽分別要鬥李斯特城、曼城及利物浦，一旦接連再輸隨時冇得翻身，前景悲觀。
車仔上周末喺英聯盃決賽射輸12碼屈居亞軍，同場加映門將阿列沙巴拿加拒絕換出鬧劇，好彩周中快車返回主場以2比0擊退熱刺，火速重建信心，而且阿列沙巴拿加亦已公開道歉淡化事件，對球隊影響減到最低。無論主帥沙利今場起用邊個把關，憑車仔個人質素要全取3分問題不大，車仔讓一球，上盤要得過。