今晚3場英超，最矚目梗係尾場默西賽德郡打吡──愛華頓主場對利物浦。呢類同市打吡戰，無論兩軍邊隊排名較高、對賽往績等數據，統統都可擺埋一邊，因為大家都唔想失威，勢必打甩門牙帶血吞，熱血到暈冇高低之分，就係打吡戰好睇之處。
李城新帥效應唔衰得
雖然利物浦喺上周中英超快車大勝屈福特5比0，只不過踢波一場還一場，睇番首循環喺主場佢哋都係險勝1粒，可見默郡打吡唔易打，而且前鋒羅拔圖法明奴應該唔出得，後備嘅奧歷治能否擔到大旗呢？實屬疑問。愛華頓既有主場之利，每逢打吡都戰意爆燈，我覺得今仗都係和味濃。
至於早場屈福特主場對「狐狸」李斯特城，啱啱先提到屈福特上周中先吞咗5蛋，最重要係「狐狸」有新帥效應。上周中羅渣士喺看台亦睇住新東家李城贏白禮頓，證明不得民心嘅領隊佩爾被炒後，班波士氣返晒嚟，相信新帥效應可維持一段時間，何況今仗係羅帥接手後首度領軍，眾將更會加多兩錢肉緊，至少能打和全身而退。（Now 621周日晚8時直播）不如將呢場串埋默郡打吡，整條和波過關2串3。