默郡打吡睇定嚟踢
今晚英超尾場上演默西賽德郡打吡，「1哥」利物浦作客硬撼死敵「拖肥糖」愛華頓。紅軍畀曼城愈追愈近，最弊係王牌穆罕默德沙拿腳風唔順，羅拔圖法明奴亦上陣成疑，火力大減下，預計今仗初段會大打穩陣波，加上近年造訪葛迪遜公園球場例開半場和，值得再追。
（Now 621周一凌晨零時15分直播）
未計今輪賽事，利物浦只領先「2哥」曼城1分，榜首位置絕對唔多穩陣。紅軍近6仗入10球，但單係上周中快車期對屈福特狂派5蛋，即係話其餘5仗只入5粒，當中有2仗食白果，呢點正係紅軍戰績下滑嘅主因，而王牌穆罕默德沙拿呢6場入得1球咁大把，狀態低沉冇晒貨賣。另一射手羅拔圖法明奴在上周「雙紅會」傷出，主帥高普話佢已進行跑步訓練，不過未肯定今仗出唔出得，若然利物浦今仗只能靠沙迪奧文尼數胡，攻擊力遭受大幅削弱，作客就更加唔敢亂攻。
紅軍4訪葛迪遜
半場全和
另一邊廂，佔主場之利嘅愛華頓在上周中快車大勝卡迪夫城3比0，終於走出3連敗困局，而且打吡前夕大勝一場，肯定有助提升士氣。中場基菲爾施古臣上仗個人省入兩粒，今季喺聯賽已累積11球進帳，連同右閘史密斯高文於上仗復出，愛華頓陣容更加完整。睇番首循環交手，「拖肥糖」只係因門神比克福特迟補時犯錯導致輸0比1，呢位門神至今仍耿耿於懷，吸取嗰次教訓後，今戰必定步步為營。最重要係紅軍近4次聯賽造訪愛華頓嘅葛迪遜公園球場，結果全部開出半場和，咁好路一於追多鋪！